Quality Service Charter ghad-Dipartiment tac-Cittadinanza u ta’ l-Expatriates

 

Werrej

Min ahna

Dan ic-charter

Is-servizzi taghna

Kif tista’ tikkuntattjana

Hinijiet tal-ftuh

L-Impenn taghna

Kif tista' tghinna

Jekk m'intix sodisfatt/a bis-servizz taghna

Nitghallmu minghandek!

 

Min ahna

Id-Dipartiment taċ-Ċittadinanza u ta’ l-Expatriates huwa responsabbli għall-amministrazzjoni tad-dispożizzjonijiet ta’:

  • Kapitlu III tal-Kostituzzjoni
  • L-Att dwar iċ-ċittadinanza Maltija (Kap. 188) – reġistrazzjoni/naturalizzazzjoni ta’ persuni bħala ċittadini ta’ Malta, konferma ta' każijiet ta' ċittadinanza doppja u l-privazzjoni ta’ ċittadinanza Maltija
  • Artikolu 44 (4) tal-Kostituzzjoni – konferma li persuni li għalihom jirreferi dan l-artikolu jgawdu ‘libertà ta’ moviment’
  • L-Att dwar l-Immigrazzjoni (Kap. 217):
  • Artikolu 4: Konferma ta’ ‘status ta’ persuna eżenti’
  • Ir-Regolamenti dwar l-Immigrazzjoni, 2004 – ħruġ ta’ Permessi Uniformi dwar ir-Residenza  
  • Regolamenti dwar l-Istatus ta’ Residenti fit-Tul (Ċittadini ta’ Pajjiżi Terzi), 2006 – konferma (permezz tal-ħruġ ta’ Permess ta’ Residenza Uniformi validu għal perjodu massimu ta’ 5 snin) ta’ residenza fit-tul

 

Dan ic-charter

Dan iċ-charter juri kif aħna beħsiebna nipprovdu u nagħtu dawn is-servizzi u jgħidlek x'għandek tistenna minna. Jgħidlek ukoll x'għandek tagħmel jekk int trid li s-servizz tagħna jitbiddel jew jitjieb. Aħna regolarment niċċekkjaw u nippruvaw intejbu s-servizzi tagħna skond l-istandards tal-Quality Service charter. B'dan ic-charter, aħna qed nintrabtu li nagħtu servizz ta' kwalita`.

Ħriġna numru ta’ fuljetti li jagħtu informazzjoni dwar is-servizzi diversi li noffru. Kull fuljett jispjega fid-dettall is-servizzi partikolari, min jista’ jibbenefika minnhom, il-proċedura li għandha tiġi segwita u d-dokumenti li għandhom jiġu ppreżentati. Kull fuljett għandu numru u l-ittri CEA (ċittadinanza u Expatriates). Dawn il-fuljetti jistgħu jinkisbu mid-Dipartiment tagħna.

Għan importanti ta’ dan iċ-charter huwa li tissaħħah l-informazzjoni li tinsab f’dawn il-fuljetti u li nuru l-impenn tagħna billi nistabbilixxu standards għal kull servizz li jingħata.

 

Is-servizzi taghna
  • Jekk ikollok bżonn informazzjoni dwar iċ-ċittadinanza tiegħek, nistgħu nikkonfermaw jekk qattx kont ċittadin ta’ Malta, jekk għadekx ċittadin ta’ Malta u x’għandek tagħmel biex iżżomm iċ-ċittadinanza Maltija (Fuljett CEA 1)
  • Jekk inti barrani miżżewweġ ċittadin ta’ Malta jew li kien ċittadin ta' Malta, jew il-wild minn omm Maltija imwieled barra minn Malta bejn 21.09.64 u 31.07.98, nistgħu nagħtuk l-għajnuna li jkollok bżonn biex takkwista ċittadinanza Maltija permezz ta’ reġistrazzjoni (Fuljett CEA 2)
  • Jekk int eliġibbli biex tapplika għal naturalizzazzjoni bħala ċittadin ta’ Malta, nistgħu ninfurmawk dwar il-proċeduri li għandek issegwi. Id-deċiżjoni dwar jekk għandhiex tingħatalek iċ-ċittadinanza tiddependi fuq kemm hu possibbli li l-applikazzjoni tiegħek tiġi kkunsidrata taħt il-parametri dwar iċ-ċittadinanza li hemm fil-preżent u/jew il-politika tal-gvern (Fuljett CEA 3)
  • Jekk int akkwistajt iċ-ċittadinanza Maltija fil-21.09.64 jew meta twelidt u kont jew għadek emigrant jew jekk kont tgħix jew għadek tgħix barra minn Malta u żammejt jew ksibt jew wasalt biex tikseb ċittadinanza li mhix Maltija, nistgħu nikkonfermawlek jekk tikkwalifikax għal ċittadinanza doppja (Fuljett CEA 4)
  • Jekk għandek bżonn tirreġistra:

      - iċ-ċertifikat tat-twelid ta’ ċittadin ta’ Malta li twieled barra

      - iċ-ċertifikat taż-żwieġ ta’ ċittadin ta’ Malta li żżewweġ barra

      - iċ-ċertifikat tal-mewt ta' ċittadin ta’ Malta li miet barra minn Malta

            ikollok tasal wasla sad-Dipartiment tagħna qabel tmur ir-Reġistru Pubbliku (Fuljett             CEA 5).

  • Jekk inti:

      - kont ċittadin ta’ Malta u twelidt ukoll Malta iżda tlift iċ-ċittadinanza Maltija wara li                       emigrajt

      -  ir-raġel jew mara mhux Maltija ta’ ċittadin ta’ Malta u ilek miżżewweġ/miżżewġa 5                      snin u għadek tgħix mar-raġel jew mara Maltija

      - l-armel/armla ta' ċittadin ta' Malta li kont ilek miżżewweġ/miżżewġa 5 snin jew 5             snin għaddew mid-data taż-żwieġ jew ta' persuna li kellha ċittadinanza Maltija (ara aktar 'l fuq)

            - l-iben/bint ta’ ċittadin ta’ Malta jew ta’ persuna li kellha ċittadinanza Maltija (ara aktar 'l fuq)

            tgawdi libertà ta’ moviment, jiġifieri, tista’ tibqa’ hawn Malta u tista’ taħdem            hawnhekk (fil-każ ta’ l-ulied dan japplika biss sakemm jagħlqu l-21 sena)

  • Jekk int ir-raġel jew mara mhux Malti ta’ ċittadin ta’ Malta iżda għadhom ma għaddewx 5 snin mid-data taż-żwieġ, jew int l-armel/armla ta' ċittadin ta' Malta li miet/mietet qabel 5 snin ta’ żwieġ, allura tgawdi l-istatus ta’ persuna eżenti li jintitolak għall-istess drittijiet ta’ libertà ta’ moviment (Fuljett CEA 6).
  • Jekk inti Ċittadin ta’ Pajjiż Terz (li jfisser m’intix ċittadin minn Stat Membru ta’ l-UE jew minn Iceland, in-Norveġja jew Liechtenstein) u ngħatajt liċenzja tax-xogħol jew permess għal residenza permanenti taħt ir-Regolamenti ta’ l-Iskema tar-Residenti, 2004 – permess tas-CIR, jew tixtieq tgħix Malta bħala persuna li kapaċi ssostni lilha nnifsha ekonomikament, jew inti s-sieħeb/sieħba ta’ ċittadin Malti/Ċittadin ta’ Pajjiż Terz (TCN) jew tixtieq tgħix hawn għal xi raġuni oħra aċċettabbli, int jista’ jinħariġlek permess uniformi għal residenza b’perjodu massimu ta’ validita’ ta’ sena biex ikopri ż-żjara tiegħek f'Malta.
  • Jekk inti Ċittadin ta’ Pajjiż Terz li kont qed tgħix b'mod regolari u legali f'Malta għal talanqas 5 snin u jekk tissodisfa l-kondizzjonijiet ta' l-istatus tar-Regolamenti dwar ir-Residenti fit-Tul (Ċittadini ta' Pajjiż Terz), 2006, inti jista’ jinħariġlek permess uniformi għal residenza validu għal 5 snin, li jiġi awtomatikament imġedded sussegwentement għal 5 snin oħra.

 

Kif tista’ tikkuntattjana

Id-Dipartiment tagħna jinsab ħdejn il-Berġa ta’ Kastilja (l-Uffiċċju tal-Prim Ministru), viċin il-Barrakka ta’ Fuq. Tista' tikkuntattjana billi:

  • tiġi personalment jew tikteb f'dan l-indirizz:

Dipartiment għaċ-ċittadinanza u ta’ l-Expatriates

3, Pjazza Kastilja

Valletta CMR 02

  • iċċempel fuq 2200 1800
  • tibgħat fax fuq 2200 1830
  • tibgħat e-mail fuq citizenship@gov.mt
  • tidħol fuq il-website

http:www.mjha.gov.mt/services/citizenship/citizenship.html

 

Hinijiet tal-ftuh

 

Id-Dipartiment huwa miftuħ għall-pubbliku f'dawn il-ħinijiet:

8.30 a.m. - 12.30 a.m.

It-Tnejn sal-Ġimgħa s-sena kollha.

Id-Direttur jilqa’ membri tal-pubbliku fuq bażi ta’ appuntament biss. Għal dan il-għan tista’ ċċempel id-Dipartiment tagħna fuq in-numru 2200 1801 biex tagħmel appuntament.

L-Impenn taghna

Nittamaw li ssibu d-Dipartiment tagħna nadif u komdu. Aħna nagħmlu l-almu tagħna biex l-uffiċjali li magħhom għandkom appuntamenti jew li għandhom jieħdu ħsieb il-każ tagħkom jarawkom kemm jista' jkun malajr.

F’dawk il-każijiet fejn l-għoti tas-servizz jiddependi mid-Dipartiment tagħna biss, bħal per eżempju fil-każ ta’ konferma ta’:

  • libertà ta’ moviment
  • status ta’ persuna eżenti
  • ċittadinanza doppja

tirċievi risposta mingħandna fi żmien tliet ġimgħat mid-data tat-talba tiegħek.

L-għoti ta’ ċertu servizzi ma jiddependix biss mid-Dipartiment tagħna u jkollna bżonn il-ko-operazzjoni ta’ oħrajn bħal, per eżempju, il-Pulizija, F’każijiet bħal dawn, nippruvaw nagħtu s-servizz fiż-żmien stipulat kif ġej:

 

 Perijodu *

Massimu*
Reġistrazzjoni ta' persuni li kienu ċittadini ta' Malta jew ta' tfal imwielda barra minn Malta minn omm Maltija Xahar
Ħruġ ta’ permess uniformi għal residenza Xahrejn
Ħruġ ta’ permess ta' residenza fit-tul 6 xhur
Naturalizzazzjoni ta’ persuna bħala ċittadin ta’ Malta 4 xhur

 bħala ċittadin ta’ Malta

 Perijodu

Minimu**
Reġistrazzjoni bħala ċittadin ta’ Malta ta’ persuna miżżewġa ċittadin Malti 4 xhur

* Mid-data ta’ meta taslilna l-applikazzjoni.

** Peress li m’huwiex possibbli li jiġi determinat kemm għandhom idumu l-investigazzjonijiet f’dawn il-każijiet, jista’ jiġi indikat perijodu minimu biss.

Għal dik li hija korrispondenza ta’ rutina, inkluż l-emails, għandek tirċievi risposta mingħandna fi żmien 5 ijiem tax-xogħol. Jekk għal xi raġuni dan ma jkunx possibbli, ninfurmawk dwar l-azzjoni li qed tittieħed.

 

Kif tista' tghinna

Xi eżempji dwar kif tista’ tgħinna nipprovdu servizz aħjar:

  • Jekk int applikajt għal ċittadinanza Maltija u ġejt mitlub mill-Pulizija ta’ l-Immigrazzjoni biex tasal wasla s’għandhom u teħdilhom xi dokumenti, agħmel dan minnufih.
  • Jekk qed tapplika għal permess uniformi għal residenza jekk jogħġbok aċċerta ruħek li timla l-formola ta’ l-applikazzjoni adattata (CEA/20) kif jixraq u li l-fotokopji tad-dokumenti meħtieġa (flimkien ma’  l-oriġinali) jiġu preżentati lid-Dipartiment.
  • Jekk qed tapplika għal permess uniformi għal residenza għal xi membru tal-familja jekk jogħġbok aċċerta ruħek li inti, bħala d-detentur tal-permess uniformi għal residenza jew bħala l-applikant għal permess uniformi għal residenza, tiffirma l-applikazzjoni relattiva (CEA/23).
  • Jekk qed tapplika għal permess ta’ residenza fit-tul, flimkien mal-formola ta’ l-applikazzjoni mimlija (CEA/20) inti għandek tipprovdi d-dokumenti meħtieġa (l-oriġinali + il-fotokopji) biex ikopru l-aħħar ħames snin qabel id-data ta' l-applikazzjoni.
  • Fil-każijiet ta’ l-aħħar ta’ min jikkonsulta l-fuljett tagħna dwar il-Permess Uniformi għal Residenza (li jinkisbu mid-Dipartiment) u li jistgħu jinstabu fuq is-sit ta' l-internet tal-Ministeru (MJHA) jew li jistgħu jintalbu wkoll bl-email fuq:  citizenship@gov.mt  Wieħed hu mħeġġeġ ukoll biex jaqra n-noti li hemm fil-formoli ta’ l-applikazzjoni msemmija hawn fuq. 

Nitolbuk ukoll biex:

  • tuża l-korteżija u tikkopera ma’ l-istaff tagħna
  • tiġi d-Dipartiment biss fil-ħinijiet li nkunu miftuħin għall-pubbliku
  • iċċempel minn qabel jekk tkun trid tkellem lil xi uffiċjal tad-Dipartiment minħabba xi bżonn urġenti sabiex isiru l-arranġamenti neċessarji
  • taċċerta ruħek li għandek id-dokumenti kollha meħtieġa qabel ma tiġi d-Dipartiment

 

Jekk m'intix sodisfatt/a bis-servizz taghna

Hu importanti li tkun sodisfatt/a bis-servizzi tagħna. Jekk taħseb li aħna b'xi mod inqasna milli nagħtuk il-livell ta' servizz li aħna wegħidnik int tista' tagħmel ilment. Aħna naraw l-ilmenti kollha għaliex dawn jgħinuna biex intejbu s-servizzi tagħna u għaliex is-sodisfazzjon tiegħek hu essenzjali għalina.

Tista’ tibgħat l-ilment tiegħek bil-miktub, billi timla l-parti relevanti tal-Feedback Form jew iċċemplilna biex tagħmel appuntament ma’ l-Uffiċjal tal-Customer Care tagħna biex tiddiskuti l-ilment tiegħek. L-uffiċjal tagħna jieħu ħsieb jinvestiga l-ilment tiegħek u javżak bir-riżultat fi żmien ġimgħa.

Jekk l-ilment tiegħek jeħtieġ aktar żmien biex jiġi investigat, ninfurmawk b’dan bil-miktub. Jekk xorta ma tibqax sodisfatt bir-risposta li tajnik, tista’ tressaq l-ilment tiegħek lid-:

Direttur

Dipartiment taċ-ċittadinanza u ta’ l-Expatriates

3, Pjazza Kastilja

Valletta CMR 02

Id-Direttur jibagħtlek risposta fi żmien 10 ijiem tax-xogħol.

Nixtiequ ninfurmawk li ma nkunux nistgħu nipproċessaw l-ilment tiegħek jekk:

  • ma tikkwalifikax għal servizz
  • l-applikazzjoni tiegħek għal ċittadinanza Maltija ġiet miċħuda. F’dan ir-rigward, għandek tinnota li Artikolu 14 ta’ l-Att dwar iċ-ċittadinanza Maltija (Kap. 188) jistipula li ‘l-Ministru (responsabbli għall-ħwejjeġ li għandhom x’jaqsmu maċ-ċittadinanza Maltija) ma jkunx meħtieġ li jagħti xi raġuni għall-għoti jew għaċ-ċaħda ta’ xi applikazzjoni skond dan l-Att u d-deċiżjoni tal-Ministru fuq xi applikazzjoni bħal dik ma tkunx soġġetta għal appell jew reviżjoni f’xi qorti.’
  • L-applikazzjoni tiegħek għal permess uniformi għal residenza ma ġiex appoġġjat għal kollox mid-dokumenti mitluba.
  • Inti ma tissodisfax il-kundizzjonijiet dwar l-istatus ta' residenza fit-tul, speċjalment jekk qbiżt il-perjodi permessibbli ta' assenza minn Malta.

 

Nitghallmu minghandek!

Aħna kontinwament qed nagħmlu ħilitna biex nipprovdulek servizz li jissodisfa l-bżonnijiet tiegħek u ghalhekk nilqgħu kull kumment jew suggeriment li jista' jgħinna ntejbu s-servizz tagħna. Jekk jogħgbok, tina l-kummenti tiegħek billi timla Feedback Form u tħallihielna fil-kaxxa tas-suggerimenti li għamilna apposta fir-reception area jew billi tibgħatha bil-posta.

Kull informazzjoni f'dan il-fuljett hija korretta sakemm morna għall-istampa. Informazzjoni aggornata tinsab fuq il-website taċ-Charter Support Unit.

 

 

L-ewwel pubblikazzjoni Awissu 1999

Ottubru 2003

Dicembru 2007

 

 

Ippubblikat mic-Charter Support Unit, OPM

http://www.servicecharters.gov.mt

Stampar, Stamperija tal-Gvern